स्याङ्जा का युवाले लेखे प्रम ओलि लाई खुल्ला पत्र

सम्माननीय प्रधानमन्त्री ज्यू,

तपाईं, हामी सारा नेपालीको एक जिम्मेवार अभिभावक हुनुहुन्छ । २०२६ सालमा नेपाल कम्युनिस्ट पार्टीको सदस्यता ग्रहण गर्नु अघि सात सालको क्रान्तिदेखि पन्चायत र राजतन्त्रको उन्मुलन भनी देशलाई गणतन्त्रको अनुपम परिभाषाभित्र समेट्न तपाईंले गरेको योगदान पक्कै पनि कसैले चाहेर पनि बिर्सन नसक्ला। नेपालका अधिक जनताले देश बिकासमा तपाईंको विकल्प छैन भन्दै गर्दा तपाईंसँग हाम्रो अपेक्षा अनगिन्ती हुनु पक्कै पनि स्वभाविक हो। दुईतिहाइ सरकारको अस्त्र हातमा लिएर शासनको बागडोर सम्हाली "सुखी नेपाली समृद्ध नेपाल" बनाउने तपाईंको आकाङ्क्षा सबै नेपालीलाई स्वागतयोग्य नहुने कुरै भएन । किनभने नेपाली जनताले तपाईंको निधारमा दुईतिहाइको चन्दन लगाएर पाँच वर्षे आयुको शुभकामना दिदै आशा र भरोसाका साथ देश सुम्पेका हुन् ।

रंगिन टेलिभिजनका पर्दामा देखाइएका विशाल सपना ,जनतालाई जिउँदै स्वर्ग जान पाउने युधिस्ठिर बनाउने जस्ता आशा देखाइ मनमोहक तुरुपहरु चुनावी मैदानमा फालेर तपाईं सत्ताको भर्‍याङ चढेको कुरा त अवगत नै होला नि है ? आज समय र उपलब्धिसँगैको यात्रामा हिजो बुनेका ती सपना कुनै चलचित्रको स्क्रिप्ट जसरी 'रिमुभ' र 'डिलिट' गर्न मिल्नी भए आज तिनका शेष खोज्न 'रिसाइकल बिन' मै पुग्न पर्ने अवस्थाको संकेत त सायदै तपाईलाई हेक्का होला ?

सम्मानयीय प्रधानमन्त्री ज्यू,

तपाईंको रामराज्यमा आज सीताहरुलाई एसिडले स्नान गराइएको , कयौं निर्मलाहरुको अस्मिता भष्म पार्ने रावणहरु यहि सडकमा खुलेआम बजार पिटेर तपाईंको न्यायलयलाई चुनौती दिदै हिडिरहेको त देख्नुभाछ होला नि ? मोतियाबिन्दु त जनताको आँखामा लाग्या रैछ ।त्यसैले तपाईको आँखाले त काम गर्छ भन्नेमा नेपाली जनतालाई पूर्ण विश्वास छ । अब यति भनिदिनुस् , आखिर मर्यादापुरुष कथित रामहरुसँग सीताहरु कहिलेसम्म होसियार भएर डराइडराइ हिड्नुपर्ने हो ? दोषीले उन्मुक्ति पाउने र निर्दोष दण्डित हुने अवस्था देख्दादेख्दै हाम्रो राज्यसत्ता निष्पक्ष छ भनेर कसरी विश्वास गर्ने ? के तपाईंले लोकतन्त्रको लडाइँका निम्ति १४ वर्ष जेलेनेल भोगेको भन्नुको तात्पर्य आज यहि बुझ्नुपर्ने अवस्था हो ?